Жени што инспирираат: Разговор со м-р Ивона Недевска Трајкова за успехот во градежништвото

Создадовме платформа за жени миленијалки кои работат во индустријата и се подготвени да ги споделат своите успешни приказни. Започнавме серијал интервјуа каде ги пренесуваме нивните инспиративни искуства и успеси, ставајќи акцент на жените што го трансформираат светот околу себе. Разговараме со м-р Ивона Недевска Трајкова, градежен инженер и асистент на Градежниот факултет во Скопје, Катедра за железници.

Можете ли да ни кажете повеќе за компанијата во која работите и нејзината цел?

Работам како асистент на Градежниот факултет во Скопје, на Катедрата за железници. Нашата основна мисија е да ги едуцираме идните инженери кои ќе придонесуваат кон подобра, побезбедна и поодржлива транспортна инфраструктура. Покрај наставата, активно сум вклучена и во научноистражувачка работа, особено во областа на одржувањето на железничката инфраструктура и анализа на квалитетот на колосекот. Моментално работам и на докторски труд кој се фокусира токму на оваа тема – што е голем предизвик, но и веројатно најголемо достигнување во досегашната кариера.

Со какви предизвици сте се соочиле како жена миленијалец која работи во вашата индустрија, и како сте ги надминале?

Да се види жена на градилиште и понатаму е необична глетка за голем дел од јавноста. Но, таа слика се менува со зголемениот број жени кои се одлучуваат да студираат во областа на градежништвото. Како жена миленијалец во градежништвото, често ми велат дека сум „во нетипична професија“. Но, искрено, моето искуство е многу позитивно – од самиот почеток сум прифатена со почит и поддршка од колегите. Никогаш не сум се соочила со отворена дискриминација, напротив, мојот труд и знаење секогаш биле ценети.
Секако, понекогаш се појавуваат суптилни моменти кои покажуваат дека стереотипите сè уште постојат – особено на терен, каде што од машките колеги може да се појави благо заштитнички однос. Но, со текот на времето, преку професионализмот и упорноста, тоа беше надминато.

Одлуката за иднината во инженерството беше нешто за што на почетокот имав измешани чувства. Меѓутоа, да се биде жена во инженерството е искрено една од најмоќните работи што сметам дека ги правам досега во мојот живот.

Како миленијалец, најголемиот предизвик ми е темпото – паралелно со наставата и теренската работа, работам и на мојот докторски труд, кој е прилично комплексен и бара многу внимание. Секако, тука е и балансот што треба да се постигне со личниот живот, но на крајот, сè што правам има смисла и ми помага да растам и како професионалец, и како личност.

Кои компетенции или вештини сметате дека се највредни за жените миленијалци на работното место, и зошто?

Мислам дека една од најважните вештини денес е способноста за адаптација. Работната средина се менува брзо, а технологијата постојано носи нови можности и предизвици. Жените миленијалци се познати по својата независност, упорност и креативност. Тие напредуваат во динамични средини и секогаш се подготвени да истражуваат нови начини за решавање на проблеми. Во градежништвото и академијата, жените миленијалци се одлични во претворањето на комплексни проблеми во практични решенија. Тие не се само технички способни – одлични се во управувањето со проекти, водат тимови со самодоверба и се сигурни дека сè се завршува на време. Јасно ги пренесуваат сложените концепти и ги прават разбирливи за сите, што ги прави незаменливи и на терен и во училницата.

Како жените миленијалци можат да продолжат да ги развиваат и усовршуваат своите вештини во индустријата?
Најважно е никогаш да не престанеме да учиме – дали преку формално образование, стручни обуки, конференции или преку практично искуство. За мене лично, многу ми помагаат проектите во кои сум вклучена и можноста да работам со различни луѓе – секоја соработка носи нешто ново. Особено би го истакнала и учеството на регионални и меѓународни конференции – тие се одлична можност не само за следење на најновите трендови, туку и за запознавање и поврзување со луѓе од градежната фела, што понатаму отвора врати за нови соработки. Исто така, би охрабрила и други жени да се вклучуваат во истражувачки активности или во меѓународни професионални мрежи – тоа носи поширок поглед и многу перспективи.

Како сметате дека жените миленијалци носат уникатна перспектива во индустријата во споредба со претходните генерации?

Жените миленијалци, вклучително и јас, пораснаа во дигитална ера, па е сосема нормално да поставуваат прашања, да се стремат кон баланс и да бараат смисла во она што го прават. Тие ја гледаат работата не само како начин за заработка, туку и како можност за создавање промени и влијание. Таа слобода да размислуваат надвор од стандардите им дава уникатна перспектива. Секако, тие се подготвени да пробаат нови работи, да се прилагодат на промени и да бидат иновативни, што не беше толку присутно кај претходните генерации. Жените миленијалци израснаа во време кога дигитализацијата и глобализацијата се случуваа набрзина, што влијаеше на тоа како гледаат на кариерата, односите и решавањето на проблемите на работното место.

Како ја гледате улогата на менторството и поддржувачките мрежи во напредокот и успехот на жените миленијалци на работното место?

Менторството е навистина важно за жените да се чувствуваат охрабрени и да веруваат во себе. Кога имаме некого што ќе не води, целиот процес станува многу полесен. Поддржувачките мрежи, исто така, се клучни – тие се одлично место за размена на искуства и идеи, помагаат во надминување на предизвици и отвораат нови можности. Жените миленијалци често се потпираат на овие мрежи, затоа што разбираат колку е важно да имаат поддршка, што им помага да се развиваат и да се чувствуваат посигурни.

м-р Ивона Недевска Трајкова

Градежен инженер и асистент на

Градежниот факултет во Скопје,

Катедра за железници