Од идеи до конкретни решенија: МИР Фондација на партнерската средба на CAROUSEL во Подгорица, Црна Гора

Како циркуларната економија да стане повидлива, поразбирлива и поблиска до луѓето? Како добрите идеи и пилот решенијата да продолжат да живеат и по завршувањето на проектните активности? Токму овие прашања беа во фокусот на партнерската средба на проектот CAROUSEL, која се одржа од 7 до 9 октомври 2026 година во Подгорица, Црна Гора, и ги обедини проектните партнери околу досегашните резултати, искуствата од пилот-активностите и следните чекори во развојот на циркуларната економија во Јадранско-јонскиот регион.

Фондацијата за менаџмент и индустриско истражување – МИР на средбата беше претставена од Габриела Костовска Богоеска, Извршен директор и Емилија Андонова, Програмски менаџер, кои учествуваа во работните сесии, дискусиите и студиските активности. Еден од главните фокуси на средбата беше напредокот во спроведувањето на пилот активностите во партнерските земји. Партнерите ги споделија своите искуства од Италија, Словенија, Грција и Србија, зборувајќи не само за постигнатите резултати, туку и за предизвиците со кои се соочиле и лекциите научени во процесот.

Овие искуства отворија простор за поширока дискусија за тоа како локалните циркуларни иницијативи можат да прераснат во практики кои ќе имаат подолгорочно влијание врз заедниците. Важен дел од разговорите беше посветен токму на одржливоста на резултатите од CAROUSEL. Во рамки на средбата, партнерите имаа можност да разговараат и со претставници на Фондот за заштита на животната средина на Црна Гора – Eco Fund, при што беа разгледани можностите за идни соработки и поддршка на иницијативи поврзани со зелената и циркуларната транзиција.

Преку студиска посета посветена на промовирањето на циркуларната економија преку раскажување приказни и вклучување на јавноста, партнерите имаа можност да видат како одржливоста може да се комуницира на креативен и непосреден начин. Посетата на REMID VIS овозможи запознавање со иновативни практики за upcycling и со начини на кои материјалите што веќе ја исполниле својата првична намена можат да добијат нова функција и вредност. Посебно внимание привлече и „Teodorus – The Guardian of Podgorica“, јавна уметничка инсталација која покажа дека и уметноста и јавниот простор можат да бидат силни алатки за пренесување пораки за одржливоста. Презентацијата за уметникот Данило Балетиќ дополнително ја отвори темата за улогата на креативноста, визуелното раскажување и јавниот ангажман во менувањето на начинот на кој луѓето размислуваат за отпадот, ресурсите и нивната повторна употреба.

Партнерите направија заеднички преглед на спроведувањето на проектот, комуникациските и дисеминациските активности, проектниот менаџмент и досегашниот напредок. Истовремено, беа усогласени следните активности, обврските на партнерите и приоритетите за наредниот период. За МИР Фондација, средбата во Подгорица претставуваше уште една можност искуствата од различни средини да се поврзат со активностите што се спроведуваат на локално ниво и да се разменат идеи за тоа како циркуларните практики да стигнат до што поголем број граѓани, организации и бизниси.

CAROUSEL продолжува да покажува дека циркуларноста не значи само повторна употреба на материјалите – таа значи нов начин на размислување за нивната вредност, подолг живот на производите и посилна соработка меѓу луѓето, бизнисите и заедниците. Проектот CAROUSEL – Creating A maRketplace fOr Up-cycled productS sEcond Life се реализира во рамки на програмата Interreg IPA ADRION, кофинансирана од Европската Унија.