Интервју со Билјана Арсовска: Предизвици и можности за жените миленијалци во консалтингот
Создадовме платформа за жени миленијалки кои работат во индустријата и се подготвени да ги споделат своите успешни приказни. Започнавме серијал интервјуа каде ги пренесуваме нивните инспиративни искуства и успеси, ставајќи акцент на жените што го трансформираат светот околу себе. Разговараме со Билјана Арсовска, Маркетинг менаџер во МОБЕС Квалитет.

Можете ли да ни кажете повеќе за компанијата во која работите и нејзината цел?
Мобес Квалитет Скопје е консултантска компанија специјализирана за помагање на мали, средни и големи компании и организации од јавниот сектор со цел подобрување на начинот на водење на својот бизнис преку соработка за воведување, обука и помагање при сертификација на менаџмент системи. Целта ни е континуирано и доследно да ги исполниме барањата и очекувањата на клиентите, барањата на стандардите, националните прописи и меѓународните стандарди. Постојано ги следиме потребите на пазарот и сакаме да бидеме фер и транспарентна конкуренција, која јасно се разликува од квалитетот на услугите.

Со какви предизвици сте се соочиле како жена миленијалец која работи во вашата индустрија, и како сте ги надминале?
Како жена миленијалец која работи во консултантскиот дел, најчесто се соочувам со балансот помеѓу работата и личниот живот, односно семејните обврски. Ова го надминувам со флексибилни работни услови, т.е. работа од дома или адаптирање на работното време.
Кои компетенции или вештини сметате дека се највредни за жените миленијалци на работното место, и зошто?
За моето работно место, потребно е да се има добри комуникациски и организациски вештини, флексибилност, адаптивност, работа во тим, стратешко размислување и решавање на проблеми и конфликти. Добрата комуникација со клиентите е особено важна за ефикасно работење и управување со проектите. Стратешкото размислување е потребно за полесно решавање на проблемите и конфликтите.
Како жените миленијалци можат да продолжат да ги развиваат и усовршуваат своите вештини во индустријата?
Жените миленијалци можат да продолжат да ги развиваат и усовршуваат своите вештини преку: континуирано учење, професионално образование, развој на нови способности преку практично искуство, работа на лични проекти, поставување на јасни и мерливи цели, применување на нови технологии и друго.
Како сметате дека жените миленијалци носат уникатна перспектива во индустријата во споредба со претходните генерации?
Жените миленијалци во споредба со претходните генерации имаат способност за брзо приспособување на новите технологии и социјални промени. Посветени се на родовата еднаквост и балансирање помеѓу работата и личниот живот.
Како ја гледате улогата на менторството и поддржувачките мрежи во напредокот и успехот на жените миленијалци на работното место?
Менторството и поддржувачките мрежи играат клучна улога во успехот на жените миленијалци на работното место. Им овозможуваат континуиран развој на личен и професионален успех, решавање на проблеми и предизвици, изградба на професионални врски.
Серијалот на интервјуа е дел од проектот EMPOWERING (EMPOWERING – EmpoweRING M-women in industry) кој е посветен на жените од милениумската генерација (родени помеѓу 1980 и 1995 година) кои работат во индустријата за производство, со мисија да ја поддржи нивната професионална едукација, унапредување на вештините и можностите за развој на кариерата. Нашата цел е не само да ја зајакнеме вашата позиција во индустријата, туку и да промовираме европска соработка и мрежно поврзување, кои се клучни за успех во денешниот свет.
Билјана Арсовска, Маркетинг менаџер
МОБЕС Квалитет
