Успешно организирана фокус група во рамки на прекуграничниот проект „ЦБЦ еквилајзер за пол и возраст на работните места“
На 13 декември 2024 година, Фондација МИР организираше фокус група во рамки на проектот „ЦБЦ еквилајзер за пол и возраст на работните места“. На настанот, кој се одржа во Хотел Парк во Скопје, учествуваа различни претставници од јавниот и приватниот сектор, како и претставници од невладиниот сектор кои се залагаат за подобрување на положбата на жените во индустриите кои традиционално се доминирани од мажи.
Целта на фокус групата беше да се отвори простор за конструктивен дијалог околу клучните предизвици со кои се соочуваат жените во овие сектори, како и да се разгледаат начини за унапредување на нивниот статус и еднакви можности на работните места. Учесниците дискутираа за важноста на политиките и институционалната поддршка, но и за значењето на образованието и обуките, како и потребата од преквалификација и неформално образование за жените.
На фокус групата учествуваа претставници од:
- Агенцијата за поддршка на претприемништво на Република Северна Македонија
- Општината Ѓорче Петров
- Јавната институција Центар за образование на возрасни
- Невладини организации кои работат на подобрување на положбата на жените
- Средното градежно гимназиско училиште „Здравко Цветковски“
- Градежна компанија
- Конфедерацијата на слободни синдикати на Македонија (КСС)
Дискусиите и собраните идеи ќе бидат искористени за развој на препораки, кои ќе бидат вклучени во бриф за политики. Овие препораки имаат за цел да ги информираат релевантните засегнати страни за конкретни мерки што треба да бидат преземени за поддршка на жените во овие сектори, со што ќе се помогне во понатамошното унапредување на родовата еднаквост на работните места, како на национално така и на регионално ниво.
Овој проект го спроведуваат Фондација за менаџмент и индустриско истражување – МИР во партнерство со Граѓанското здружение „Праведни и Професионални“, Здружение на бизнис жени во Србија и Здружение на бизнис жени Врање. Проектот се спроведува во Република Србија: Врање со две градски општини: Врање и Врњска Бања, општина Владичин Хан и општина Трговиште и во Република Северна Македонија во општините Бутел и Ѓорче Петров.
