Одржана EWA обука за бизнис модели, финансиско управување и правни аспекти за претприемачки

Денес, 12 септември 2025 година, во рамки на програмата Empowering Women in Agrifood (EWA), поддржана од EIT Food и локално спроведена од Фондацијата за менаџмент и индустриско истражување, се одржа обука на две теми од клучно значење за секоја жена лидер: бизнис модели, финансиско управување и правни аспекти за претприемачки.

Обуката беше наменета за 10-те избрани учеснички во овогодишната програма, жени со визија и капацитет да градат успешни бизниси. Сесиите беа водени од Александар Целески, професионален обучувач кој низ интерактивен пристап и практични вежби ги охрабри учесничките да ги развиваат своите претприемачки вештини и знаења.

Во првиот дел Дефинирање на бизнис модел, учесничките се запознаа со основните компоненти на еден стабилен бизнис модел, стратегии за усогласување со пазарните барања и вредности, како и практични совети за обезбедување одржливост и можност за скалабилност на бизнисот.

Во вториот дел Финансиско управување, им се овозможи на учесничките да стекнат суштински знаења и практични вештини за управување со финансии и донесување информирани финансиски проекции за своите бизниси.

Обуката беше динамична, практична и интерактивна. Учесниците не само што добија конкретни алатки и знаења, туку и создадоа поддржувачка средина за личен и професионален развој. Денот заврши со инспиративна размена на искуства и конкретни планови за примена на наученото во реални бизнис ситуации.

Ова беше уште еден чекор во градењето на самоуверени, одлучни и компетентни претприемачки – токму какви што се потребни за да го развиваат и подобруваат својот бизнис. Учесничките заминаа со нови вештини, повисока самодоверба и јасна визија како да ги применат научените техники во своите бизнис-приказни.

По завршувањето на обуката, учесничките ќе добијат материјали со домашни задачи за двете теми, како и снимен материјал за следната сесија: Правни прашања. Сесијата се фокусира на клучни правни аспекти што ниту една стартап компанија не смее да ги занемари: видови бизнис ентитети, важни правни договори како NDA и договори меѓу основачи, како и права на интелектуална сопственост, особено значајни за иновации во агрофуд секторот.

На овој начин, обуката продолжува да обезбедува континуирано учење и практична поддршка за успешен развој на бизнисите на учесничките.

👩‍🌾 Што всушност претставува програмата EWA?

Empowering Women in Agrifood (EWA) е европска програма која им помага на жените претприемачки во агро-прехранбениот сектор да ги развијат своите иновативни идеи – не само преку финансиска поддршка, туку и преку стручни обуки, менторска поддршка и можности за вмрежување. Програмата е насочена кон жени во рана фаза од претприемничка кариера, обезбедувајќи им пристап до релевантно знаење и контакти кои им се неопходни за развој на одржлив и успешен бизнис.

Локален партнер на програмата е Фондацијата за менаџмент и индустриско истражување (МИР) – фондација која активно работи на поттикнување на иновации, трансфер на технологии и унапредување на родовата еднаквост во претприемништвото и истражувањето. Преку своите активности, Фондацијата:

• Истражува и иновира за поддршка на одржлив раст
• Соработува со претпријатија за пристап до глобални пазари
• Промовира еко-иновации и нови деловни можности
• Поттикнува социјална кохезија и инклузивен развој

За првпат оваа година, програмата EWA се спроведува во Македонија токму преку Фондација за Менаџмент и индустриско истражување – чекор напред во поддршката на женското претприемништво и иновативниот агро-прехранбениот сектор.