EWA ментори во фокус: Совети од најдобрите – Интервју со Загорка Блажевска

Во свет кој постојано се менува, каде што знаењето и искуството играат клучна улога во личниот и професионалниот развој, менторството станува еден од највредните алати за поддршка и напредок. Во таа насока, во рамки на програмата Empowering Women in Agrifood (ЕWA), менторството го зазема централното место, тоа не само советодавна улога, менторството е низа на падови и подеми  која треба да ја изодат избраните жени претприемачки водени од своите ментори.

EWA програмата е креирана од EIT Food, најголемата европска иницијатива за иновации во храна, која се спроведува во Македонија во соработка со Фондација за Менаџмент и индустриско истражување. По успешното започнување на оваа иницијатива, решивме да започнеме серијал „EWA ментори во фокус: Совети од најдобрите“ во кој ќе ве запознаеме со менторите кои стојат зад развојот на бизнис идеите предводени од избраните кандидатки.

Овојпат во фокус е Загорка Блажевска, основачка и генерална директорка на Витанова, докажан мултидисциплинарен експерт со речиси две децении искуство во областа на иновациите во храна, културните индустрии и бизнис стратегијата. Нeјзината кариера опфаќа евалуација на програми, развој на политики и системска поддршка на претприемачки екосистеми, со посебен фокус на агро-прехранбениот сектор и креативните индустрии. Со својот професионален ангажман, Загорка активно придонесува за унапредување и трансформација на иновациите и претприемништвото во регионот и Европа.

Во оваа менторска приказна, тaa работи со Снежана Јаќовска, која преку креирање на интелигентна внатрешна фарма создава решенија за урбаното земјоделство, комбинирајќи модуларен аеропонски систем, автоматизација и одржливост, со цел да обезбеди здрави прехранбени производи за урбани заедници.

Кој е вашиот професионален пат и како стигнавте до позицијата ментор во EWA програмата?

Мојот професионален пат започна пред повеќе од 20 години, кога како млада жена претприемач одлучив да основам компанија која ќе создава вредност во агро-прехранбениот сектор преку иновации, одржливост и силно општествено влијание. Со текот на времето, преку Вита Нова, учествував во многу регионални и европски проекти и развив длабоко разбирање за предизвиците и можностите во агробизнисот, секогаш ставајќи го акцентот на поддршката на жените во претприемништвото и локалниот развој.

Од пред 3 години со моето активно учество во EIT Food како оценувач на проекти и имплементатор на разни програми, а воедно и како член на EIT Food RIS Policy Council и сертифициран ментор од EIT Food Mentor Academy (2024), ме доведе до природна улога на ментор во EWA програмата и можност да го споделам моето искуство со следната генерација жени лидерки. Дополнително, поседувам национален сертификат за менторска работа и практична обука на работодавачи, што ја потврдува мојата стручност и педагошка способност.

Како ментор, што сметате дека е најважно да се пренесе на младите жени во оваа програма?

Како жена која веќе две децении е активна во приватниот сектор, најважно ми е да пренесам дека економската независност и влијание започнуваат со храброст – храброст да се постави прашање, да се донесе одлука, и да се прифати ризик.

Во оваа програма, жените добиваат повеќе од знаење – добиваат пристап до мрежа, поддршка и реални можности за развој. Но, за тоа да биде успешно, потребно е самодоверба, дисциплина и истрајност. Сакам да ги мотивирам да гледаат на себе како двигатели на промени во локалната економија и иновацискиот екосистем.

Кој е најголемиот предизвик со кој сте се соочиле на патот кон успехот и каков совет би им дале на другите жени претприемачки за да надминат слични предизвици?

Како жена претприемач во машки доминирани индустрии, најголемиот предизвик беше да се одржи гласот и вредноста на визијата во средина каде што често се очекува да се прилагодиш, наместо да водиш.

Мојот совет за младите жени е:
Никогаш не се откажувајте од автентичноста.
Верувајте во вашето знаење и сетила.
Барајте поддршка – но не се плашете да бидете лидерки.

Најголемиот успех не е награда, туку способноста да се менуваш себеси и заедницата околу тебе – и токму тоа е суштината на женското претприемништво.

Кое е вашето лично мото или филозофија кога станува збор за поддршка и развој на талентирани млади луѓе?

Моето мото е: „Не ги учи младите како да чекорат по твоите стапки – научи ги како да создадат свои.“ Поддршката значи да се препознае потенцијалот кај младите, да се охрабри нивната креативност и да им се даде простор да експериментираат и да растат. Со долгогодишна менторска пракса во деловниот сектор и едукација, верувам во практичен пристап, континуирано учење и креирање вистински деловни можности за младите луѓе – особено жените.

Програмата Empowering Women in Agrifood EWA ги поддржува жените во развојот на нивните агро-прехранбени бизнис идеи не само преку финансирање, туку и преку специјализирани обуки, менторство и можности за вмрежување. Оваа иницијатива има за цел сеопфатно да ги поддржи претприемачките жени во раната фаза од нивната кариера, притоа овозможувајќи им пристап до знаење и релевантни контакти за успешен почеток и развој на одржливи бизниси во агро-прехранбениот сектор.

Во време кога агро-прехранбениот сектор се соочува со потреба од дигитална трансформација, одржливост и иновација, прашањето е: Кој ќе ги донесе тие промени ако не жените со визија? А кој ќе ги поддржи, ако не менторите со искуство?