Интервју со Софија Грујевска за улогата на жените миленијалки во архитектурата и градежништвото

Создадовме платформа за жени миленијалки кои работат во индустријата и се подготвени да ги споделат своите успешни приказни. Започнавме серијал интервјуа каде ги пренесуваме нивните инспиративни искуства и успеси, ставајќи акцент на жените што го трансформираат светот околу себе. Разговараме со Софија Грујевска, Архитект и Сопственик ДИМЕНЗИЈА ДООЕЛ Скопје.

Можете ли да ни кажете повеќе за компанијата во која работите и нејзината цел?

Димензија е архитектонско студио формирано во 2018 година. Нашата цел е понуда на професионални услуги од областа на архитектурата и градежништвото, главно за надзор и организација на градба, со цел да придонесеме во изградбата на одржливи и висококвалитетни објекти со врвна естетика.

Со какви предизвици сте се соочиле како жена миленијалец која работи во вашата индустрија, и како сте ги надминале?

Да се биде дел од Y генерацијата е доста специфично искуство. Ние сме мост помеѓу два различни света – го разбираме традиционалниот начин на размислување на постарите генерации, но истовремено сме во чекор со модерните технологии и брзите промени кои ги носи новото време. Нашата улога е да направиме успешна транзиција на вредностите помеѓу овие две структури, бидејќи иако јазот помеѓу генерациите е значителен, секоја од нив има свој непроценлив придонес. Постарите носат стабилност, искуство и темелни вредности кои треба да ги прифатиме, додека модерната технологија и вештачката интелигенција отвараат нови можности кои треба да ги интегрираме во системот.

Како жена миленијалец, особено во градежништвото, сум се соочувала со предизвици во однос на стереотипните размислувања на дел од работниците – кои потешко прифаќаат насоки од помлади инженери, но вакви ситуации се надминуваат штом им ги воочите вистинските бенефити на вашите насоки, а притоа ги сослушате и нивните предлози. Вусшност, раководењето со човечки ресурси (во секој сектор) е многу деликатна работа што опфаќа многу повеќе сегменти од само генерациски гап или различен пол. Мојата идеална комбинација за управување се состои од употреба на трансформациско лидерство со активирање на интринзична мотивација кај вработените и во тој смер се развива организациската култура во нашето студио.

Кои компетенции или вештини сметате дека се највредни за жените миленијалци на работното место, и зошто?

Клучните компетенции и вештини за жените миленијалци, како и за сите професионалци, вклучуваат одговорност во работата, професионален и квалитетен пристап кон задачите; и непоколеблив интегритет. Имањето принципи и доследност во нивното почитување е основа за градење доверба, почит и успешна кариера. Дополнително, важни се и адаптибилноста, емоционалната интелигенција и силните комуникациски вештини.

Како жените миленијалци можат да продолжат да ги развиваат и усовршуваат своите вештини во индустријата?

Едукацијата е основа за секој напредок. Покрај професионалното образование, формално или неформално, важно е да се балансира и негува менталното и физичкото здравје. Сметам дека колку и да имаме обврски – приватни или деловни, секој мора да одвојува време периодично за континуирано учење, истражување на нови алакти во неговата област, но и доедуцирање во други области доколку има интерес. Според мене, клучно е човек да ги развива сопствените силни страни и таленти за да постигне долгорочен успех и врвни перформанси. Да дополнам, најважно е прво да знае јасно и дефинира кои се неговите потенцијали/квалитети и потоа континуирано да ги развива.

Како сметате дека жените миленијалци носат уникатна перспектива во индустријата во споредба со претходните генерации?

Жените миленијалци имаат слободата на говор и изразување. Тие имаат пристап до искуството и знаењето од претходните генерации и се пионери кои се свесни за својата моќ и потенцијал. Израснати во семејства каде што нивните мајки веќе се соочиле со слични услови, од самиот почеток сме многу попривилегирани во споредба со нашите баби кои се соочувале со тешки животни услови: војни, болести, окупатори и слаб технолошки развој.

Во областа на архитектурата и градежништвото, образованието игра значајна улога во трансформацијата на професијата. Жените миленијалци имаат можност да се образуваат и специјализираат во области кои порано биле помалку достапни или резервирани за мажи. Денес, можностите за патување, комуникација и размена на искуства со професионалци од целиот свет се значително зголемени. Жените во оваа индустрија активно придонесуваат за глобалната архитектонска сцена, комбинирајќи знаење од различни култури и контексти за да креираат квалитетни и инспиративни простори.

Како ја гледате улогата на менторството и поддржувачките мрежи во напредокот и успехот на жените миленијалци на работното место?

Менторството е од суштинско значење за развојот на секој професионалец. Имав среќа да имам неколку ментори, повеќето жени, чие водство беше клучно за мојот развој. Менторството ни дава техничка и емоционална поддршка и помага во совладување на предизвиците, особено при транзиција кон нови улоги, како што е започнување сопствен бизнис. Во моментов повторно ги доживувам придобивките од менторството во текот на моето МБА патување, каде што од самиот почеток ми беше доделен ментор, за што сум навистина благодарна. Минатата година пак, имав можност јас да ја преземам улогата на ментор што за мене беше навистина вредно искуство и ми беше чест што на тој начин ми се овозможи да го пренесам моето знаење и да ги поттикнам другите да ги постигнат своите цели.

Серијалот на интервјуа е дел од проектот EMPOWERING (EMPOWERING – EmpoweRING M-women in industry) кој е посветен на жените од милениумската генерација (родени помеѓу 1980 и 1995 година) кои работат во индустријата за производство, со мисија да ја поддржи нивната професионална едукација, унапредување на вештините и можностите за развој на кариерата. Нашата цел е не само да ја зајакнеме вашата позиција во индустријата, туку и да промовираме европска соработка и мрежно поврзување, кои се клучни за успех во денешниот свет.

Софија Грујевска, Архитект и Сопственик

ДИМЕНЗИЈА ДООЕЛ Скопје